სრულად »

    საავადმყოფომ ფუნქციონირება 2006 წლის 16 იანვარს დაიწყო. გახსნისთანავე ჩატარდა უდიდესი ჰუმანიტარული სამედიცინო აქცია: უფასოდ გამოკვლეულ იქნა 3000-მდე პაციენტი. მიზანი გახლდათ მოსახლეობის მოთხოვნილების შესწავლა სამედიცინო სერვისის სახეებზე და მენეჯმენტის შესაბამისი მოდელის შექმნა. აქ ერთი წლის განმავლობაში ტარდება 4000-მდე ფართომასშტაბიანი ქირურგიული ოპერაცია, ხოლო ამბულატორულ პაციენტთა რიცხვი 38000-ს აღწევს. ეროვნულმა სამედიცინო ცენტრმა, პირველად საქართველოში, შეძლო სამედიცინო ტურიზმის განვითარება. კერძოდ, უცხოურ სადაზღვევო კომპანიებთან თანამშრომლობის შედეგად, ქუთაისში მკურნალობენ პაციენტები აზერბაიჯანიდან, რუსეთიდან, თურქეთიდან, გერმანიიდან, შოტლანდიიდან, ესტონეთიდან, უკრაინიდან და ფილიპინებიდან, მათ შორის ბევრია ცნობილი ადამიანი.
    კლინიკაში ტარდება უნიკალური მაღალტექნოლოგიური პროცედურები და ოპერაციები: გულის კვლევები მაგნიტურ-რეზონანსული და 64-შრიანი კომპიუტერული ტომოგრაფის გამოყენებით, ფილტვების, სანაღვლე გზებისა და ნაწლავების ვირტუალური რეკონსტრუქციები (MRI - Real time, Live). ასევე, თავის ტვინის პერფუზული და ფუნქციური გამოკვლევები, კომპიუტერული ნავიგაციით მუხლის სახსრის გამოცვლა - ენდოპროტეზირება, ღვიძლის ციროზების დროს - ენდოსკოპური მეთოდით - ტრანსიუგულარული პორტოკავალური ანასტომოზების დადება, საყლაპავის სტენტირება, აორტის რკალის და ყველა მაგისტრალური სისხლძარღვის პროთეზირება, მეზენტერიალური არტერიების სტენტირება მათი თრომბოზის დროს. პირველად კავკასიის რეგიონში ჩამოყალიბდა ტრანსლუმინალური ქირურგიის დეპარტამენტი. კერძოდ, ქუთაისში ჩატარდა ტრანსვაგინალური ოვარ- და ქოლეცისტექტომია, რომელიც მსოფლიოში რიგით მეოთხე ოპერაციაა: საშოსმხრივი ქირურგიული მიდგომით, ერთდროულად, ამოკვეთილ იქნა საკვერცხე და ნაღვლის ბუშტი (2007 წლის ივლისი). ასევე, შეიქმნა ჰემოდიალიზის და ექსტრაკორპორული დეტოქსიკაციის დეპარტამენტი, მთლიანად აღიჭურვა სისხლის ბანკი და ლაბორატორია ("როშე", "ებოტი", "ორთოდიაგნოსტიკი" - 2008 წ.), მიმდინარეობს ღეროვანი უჯრედების კვლევები; ჩამოყალიბდა კატასტროფათა მედიცინის სამსახური, რომელიც ემსახურება მთელ დასავლეთ საქართველოს და რომლისთვისაც პრაქტიკულად არ არსებობს არატრანსპორტირებადი პაციენტი. მოსახლეობამ მალევე იგრძნო ამ ნაბიჯის ეფექტურობა.
    ქუთაისში სწრაფი განვითარება ჰპოვეს იმ დარგებმა, რომლებიც მანამდე დასავლეთ საქართველოში საერთოდ არ არსებობდა. 6 თვის განმავლობაში წარმატებულად ჩამოყალიბდა კარდიოქირურგიის დეპარტამენტი. დღემდე ღია გულზე 300-ზე მეტი ფართომასშტაბიანი ოპერაციაა ჩატარებული, ხოლო 800-მდე ადამიანი ინტერვენციული კარდიოქირურგების წყალობით გადაურჩა სიკვდილს - კორონარული სისხლძარღვების სტენტირებამ იხსნა მათი სიცოცხლე.
    სამედიცინო პერსონალმა თავისი წვლილი შეიტანა ქვეყნის ტერიტორიული მთლიანობის აღდგენის საქმეში; შეიქმნა სამედიცინო სერვისი სამაჩაბლოსა და ზემო აფხაზეთში. 2007-2008 წლების განმავლობაში, უშუალოდ სოხუმში, ჩატარებულ იქნა 7 ურთულესი ოპერაცია. ავნევში, ვანათსა და ერგნეთში, ასევე ახალგორის რაიონში გამოკვლეულ იქნა 5000-მდე ადამიანი, 200-მდე პაციენტმა ქირურგიული მკურნალობის კურსი ქუთაისში გაიარა.
    ეროვნული სამედიცინო ცენტრი თანდათან ხდება პოსტდიპლომური და უწყვეტი სამედიცინო განათლების კერა დასავლეთ საქართველოსთვის. აქ მზადდება ქართველ ექიმთა ახალი თაობები. გარდა ამისა, შეიქმნა 500 სამუშაო ადგილი, ადამიანური და მატერიალური რესურსების მართვის თანამედროვე მოდელი, მაღალი სამედიცინო ტექნოლოგიები გატანილ იქნა რეგიონებში, ჩამოყალიბდა შიდაჰოსპიტალური მენეჯმენტის სრულიად ახალი მიმართულება.
დასავლეთ საქართველოს ეროვნული სამედიცინო ცენტრი დამსახურებულად წარმოადგენს ჩვენი ქვეყნის სავიზიტო ბარათს დანარჩენი მსოფლიოსათვის.

     გადაუდებელი სამედიცინო დახმარებისა და დიაგნოსტიკის დეპარტამენტი კატასტროფის მედიცინის, ცენტრალური ლაბორატორიის, სხივური დიაგნოესტიკის, პათოლოგიური ანატომიის სამსახურებით.